Herzlich wilkome im Kanton Schafuuse!

Es freut üüs, das Si i üüsen ufgschlossene und gliichziitig traditionsverbundene Kanton zuezoge sind.

De Kanton Schafuuse büütet Ine attraktiivi Läbes- und Aarbetsbedingige mit uusgezeichnete Vercheersverbindige und guete Beziehige zu de Noochberskantön Thurgau und Züri und au em nooche Tüütschland.

Mir sind sicher, das Si und Iri Familie sich doo schnäll wäärded wol füele, nid zletscht au dank de gsunde Naturlandschaft, em Wiibaugebiet Chläggi und de Noocherholigsgebiet am Rii und uf em Rande.

D Globalisierig, de gsellschaftlich Wandel und d Umwältveränderige stelled üüs zäme vor groossi Useforderige. Gägesiitige Respekt, Toleranz und Offeheit gägenüber üüsne Mitmäntsche sind wichtigi Grundwert und träged au zur Wilkomeskultur vom Kanton Schafuuse bii.

Nemed Si am gsellschaftliche Läbe mit sine kulturelle Veraastaaltige und em Bildigsaagebot teil. En aktiive und reege Uustuusch zwüsched de iiheimische und de zuezogene Bevölkerig träit vil derzue bii, das me sich im Kanton Schafuuse dihaam füelt. Die Broschüre hilft Ine, vil nützlichi Hiiwiis über Iren neue Wonkanton z sammle und understützt Si debii, a Irem neue Läbesort guet aazchoo.

Ich wünsche Ine bim Entdecke vom Kanton Schafuuse vil Freud und heisse Si im Name vom Regierigsroot herzlich wilkome.

Walter Vogelsanger, Regierigsroot